Ávöxtun
OKKAR sjóðir
Hér að neðan má sjá ávöxtun OKKAR sjóða.
| Sjóðir |
1.1-2.2 2012 |
2011 | 2010 | 2009 | 2008 | 2007 | 2006 | 2005 | 2004 |
|---|---|---|---|---|---|---|---|---|---|
| OKKAR erlend hlutabréf | 6,6% | -5% | -0,8% | 33% | -23% | -4,8% | 36% | 12,2% | 7,6% |
| OKKAR innlend hlutabréf | 2,7% | -3,4% | 10,7% | 18% | -88% | 1% | 13,6% | 68,3% | 50,8% |
| OKKAR blönduð hlutabréf | 5,7% | -4% | -2,4% | 51% | -51% | 4,4% | 39% | 27,7% | 11,3% |
| OKKAR blönduð verðbréf 1 | 4,3% | 0,8% | -0,3% | -4% | -34% | -0,1% | 23,5% | 1,5% | 2,9% |
| OKKAR blönduð verðbréf 2 | 3,3% | 6,4% | 4% | 9% | 4% | 1% | 15,3% | 3,7% | 4,2% |
| OKKAR blönduð verðbréf 3 | 2,4% | 11,9% | 7,7% | 11% | 5,9% | 3,4% | 10,6% | 7,4% | 12,9% |
| OKKAR innlán | 0,4% | 11,3% | 6% | 13% | 25,3% | 13,2% | 12,3% | 8,9% | 10,3% |
| OKKAR innlend skuldabréf | 2,2% | 14% | 5,1% | 11% | 39% | 4% | 5,8% | 3,7% | 7,4% |
Yfirlit yfir þróun markaða 2011
Skuldabréf og krónan
Gerðar voru þrjár breytingar á vöxtum á lánum gegn veði til sjö daga (stýrivextir) árið 2011, samanber átta breytingar árið á undan. Peningastefnunefnd Seðlabankans lækkaði vexti um 0,25 prósentustig í febrúar og voru vextirnir því komnir niður í 4,25%. Peningastefnunefndin hélt vöxtum óbreyttum þar til í ágúst þegar hún hækkaði vextina um 0,25 prósentustig, í 4,5%. Sú aðgerð kom markaðsaðilum á óvart þar sem fæstir áttu von á hækkun. Þriðja og síðasta vaxtabreytingin á árinu var í nóvember þegar vextir voru hækkaðir um 0,25 prósentustig og stóðu vextirnir því í 4,75% í árslok.
Þróun gengisvísitölu krónunnar má sjá á myndinni hér að neðan. Mest var veikningin í upphafi árs en krónan veiktist um 2,5% í janúar. Á myndinni má greina lítisháttar styrkingu í mars mánuði ásamt styrkingu á haustmánuðum. Á síðasta ári nam veiking krónunnar 4,9% eftir að hafa styrkst um 11,2% árið á undan.
Tólf mánaða verðbólga náði lágmarki í janúar 2011 í 1,8% og var næstu tvo mánuði þar á eftir undir verðbólgumarkmiði Seðlabankans, sem er 2,5%.
Mánuðina þar á eftir hækkaði verðbólgan og mældist verðbólgan 5,2% á síðasta ári. Síðastliðna tólf mánuði hefur vísitala neysluverð hækkað um 5,3%. Undanfarna þrjá mánuði hefur vísitalan hækkað um 0,7% sem jafngildir 2,8% verðbólgu á ársgrundvelli. Meðalvísitala neysluverð árið 2011 var 4,0% hærri en meðalvísitalan 2010. Samsvarandi breyting var 5,4% árið 2010 og 12,0% árið 2009.
Á síðasta ári nam meðaltalshækkun verðtryggðra skuldabréfa tæpum 18% á meðan ávöxtun óverðtryggðra skuldabréfa nam um 1%. Fyrstu átta mánuði ársins höfðu óverðtryggðu bréfin hins vegar lækkað að meðaltali um hátt í 7%. Þróun síðasta árs má sjá á myndunum hér að neðan.
Fjórir aðilar voru með reglulegar skuldabréfaútgáfur á síðasta ári; Lánasýsla ríkisins, Íbúðalánasjóður, Reykjavíkurborg og Lánasjóður sveitarfélaga. Á árinu gáfu einnig Garðabær og Íslandsbanki út skuldabréf.
Innlend hlutabréf
Úrvalsvísitala innlendra hlutabréfa lækkaði um 2,6% á síðasta ári. Árið fór vel af stað, en úrvalsvísitalan hækkaði um 7,9% í janúar en lækkaði svo um 5,6% næstu fimm mánuði og hafði því hækkað um 1,9% á fyrri helmingi ársins. Líkt og sjá má á myndinni hér að neðan lækkaði vísitalan mest á þriðja ársfjórðungi, en lækkunin nam 6,3%. Vísitalan hækkaði um 2,1% á síðasta fjórðungi ársins, en endaði árið niður um 2,6%, líkt og kom fram hér að ofan.
Af öllum félögunum í Kauphöll Íslands hækkuðu bréf Icelandair Group mest allra eða um 60%. Árið 2011 flutti Icelandair um 1,7 milljón farþega samanborið við 1,5 milljónir árið 2010 og 1,3 milljónir 2009. Sætanýtingin hjá félaginu nam 79% á síðasta ári og er það besta sætanýting í sögu félagsins.
Bréf Marels hækkuðu næst mest á síðasta ári eða um fjórðung. Pantanabók félagsins hefur aldrei verið stærri og auknar pantanir frá nýmarkaðsríkjum á borð við Kína og Brasilíu auka áhættudreifingu en landfræðileg dreifing verkefna er betri en oft áður.
Um miðjan desember hófust viðskipti með hlutabréf Haga en áttföld eftirspurn var eftir bréfum félagsins í hlutafjárútboði þar sem Arion banki seldi um 30% hlut í félaginu. Skráning Haga á markað marka ákveðin tímamót fyrir innlendan hlutabréfamarkað þar sem um er að ræða fyrstu nýskráningu síðan haustið 2008. Útboðsgengið var 13,5 kr. á hlut og stóð í 16,35 við árslok og hafði því hækkað um 21,1% frá skráningu, þar af um 18% á fyrsta degi viðskipta.
Ljóst er að vel heppnuð skráning Haga á hlutabréfamarkað mun líklega hafa jákvæð áhrif á fyrirætlanir annarra félaga varðandi skráningu. Horn fjárfestingarfélag hefur þegar tilkynnt að stefnt sé á skráningu í Kauphöll Íslands á næstunni ásamt því að félög eins og Reginn fasteignafélag, Reitir fasteignafélag og Eimskip eru líkleg til skráningar árið 2012.
Ekkert félag í Kauphöll Íslands lækkaði eins mikið á síðasta ári og BankNordik, en gengi bréfanna lækkaði um 43%, í litlum viðskiptum þó. Snemma árs 2010 yfirtók BankNordik 12 útibú danska bankans Sparebank, þar af eru þrjú staðsett á Grænlandi. Um mitt ár 2011 keypti BankNordik hluta Amagerbankans og er því kominn með ágætis stöðu á danska bankamarkaðnum. Þessi kaup hafa kostað bankann tíma og fjármuni en hafa á móti skilað auknum fjölda viðskiptavina. Tvö önnur félög lækkuðu um 30% á síðasta ári, Century Aluminum annars vegar og Atlantic Airways hins vegar. Þróun allra félaga má annars sjá á myndinni hér að ofan.
Erlend hlutabréf
Erlend hlutabréf áttu erfitt uppdráttar á síðasta ári. Veikar hagtölur og seinvirk viðbrögð við skuldavandanum á Evrusvæðinu eru helstu drifkraftarnir. Heimsvísitala hlutabréfa (MSCI World Index) lækkaði um 7,6% á síðasta ári og Evrópuvísitalan (MSCI Europe) um 10,9%.
Öllu meiri lækkun var á Norðurlöndunum þar sem MSCI Nordic vísitalan lækkaði um 17,1%. Vísitala MSCI fyrir nýmarkaðsríki (MSCI Emerging Markets) lækkaði hins vegar um 20,4% á síðasta ári. Ástæðan er tvíþætt; annars vegar aukið aðhald í peningamálastefnu í nýmarkaðsríkjum þar sem seðlabankar hafa reynt að ná niður verðbólgu og hins vegar lækkanir á hagvaxtaspám samhliða veikari vexti í þróaðri ríkjum.
Í mars mánuði reið snarpur jarðskjálfi yfir Japan og var um að ræða stærsta jarðskjálfta í sögu landsins. Þúsundir manna týndu lífi í kjölfar skjálftans þegar flóðbylgja skall á austurstönd landsins og laskaðist kælikerfi kjarnorkuvers í borginni Fukushima mikið. Hamfarirnar í Japan höfðu töluverð áhrif á fjármálamarkaði um allan heim. Framleiðslutap verksmiðja í Japan hafði áhrif á framboð á ýmsum varningi um allan heim og kom það hvað verst niður á bíla- og tækniiðnaðinum.
Lánshæfiseinkunnir voru víða lækkaðar á síðasta ári, bæði á fyrirtækjum og einstökum ríkjum. Þannig var lánshæfiseinkunn Bandaríkjanna hjá Standard & Poor‘s lækkuð úr AAA í AA+, eða um eitt þrep. Þóttu þetta talsverð tíðindi í ljósi þess að þetta er í fyrsta sinn sem ríkissjóður Bandaríkjanna nýtur ekki hæstu lánshæfiseinkunnar.
Forvitnilegt er að bera saman sveiflur á mörkuðum við VIX vísitöluna. VIX vísitalan er einn helsti mælikvarði á áhættufælni fjárfesta en hún mælir flökt í framtíðarsamningum til skemmri tíma á S&P500 vísitöluna. Samband VIX og hlutabréfavísitalna er oftast öfugt, þ.e. þegar hlutabréfamarkaðir hækka þá lækkar VIX að jafnaði. Þetta mynstur má greina á myndinni hér að neðan en VIX vísitalan hækkar mikið á þriðja ársfjórðungi eða á svipuðum tíma og markaðir lækka skarpt.
