Bætur

Börn vátryggða eru sjálfkrafa tryggð í sjúkdómatryggingunni. Ef barn vátryggða, 3 mánaða til 18 ára, verður á vátryggingatímanum fyrir bótaskyldum atburði skv. skilmálum félagsins, greiðir félagið 50% vátryggingarfjárhæðar sjúkdómatryggingarinnar, þó að hámarki 7 m.kr. Bætur úr sjúkdómatryggingu barna greiðast aðeins einu sinni fyrir hvert barn.

Greinist barn með bótaskyldan sjúkdóm og lifir í 28 daga eftir greiningu sjúkdóms, greiðast bætur í formi eingreiðslu. Bætur vegna barna hafa ekki áhrif á bótarétt vátryggingataka sjálfs.

Þær tryggingar sem hér um ræðir hafa ekki endurkaupsvirði, þar sem ekki er um að ræða söfnunartryggingar. Félagið selur söfnunartryggingar en um þær gilda aðrar reglur.

Ef í gildi er örorkutrygging vegna slyss eða sjúkdóms greiðast tvenns konar bætur.

• Tímabundin örorka er það ástand kallað meðan varanleg niðurstaða er ekki fengin vegna tjónsatburðarins. Bótalaus tími er 6 mánuðir en síðan eru bætur greiddar mánaðarlega í allt að 30 mánuði, eða þar til ástand er orðið stöðugt.
• Valdi slys eða sjúkdómur vátryggðum varanlegri skerðingu starfsorku og fyrir liggur mat þess efnis greiðir félagið örorkubætur í formi skattfrjálsrar eingreiðslu sem tekur mið af tímalengd samningsins og þeirri vátryggingarfjárhæð sem valin hefur verið.

Ef í gildi er sjúkdómatrygging, vátryggði fær bótaskyldan sjúkdóm og lifir í 28 daga eftir greiningu sjúkdómsins, eru greiddar bætur í formi eingreiðslu til vátryggða og lýkur þá tryggingunni.

Samkvæmt gildandi lögum greiðast ekki skattar af eingreiðslu tryggingabóta, hvorki tekjuskattur, fjármagnstekjuskattur né erfðafjárskattur.

Ef í gildi er líftrygging og vátryggður andast áður en tryggingunni lýkur eru greiddar út bætur í formi eingreiðslu til rétthafa bóta úr tryggingunni, en rétthafar eru skilgreindir í vátryggingaumsókn. Bætur greiðast eigi síðar en 14 dögum eftir að félagið hefur fengið nauðsynleg gögn.